健康新聞

點解肝癌患者嘅肝功能一般唔太理想？咁係因為，大部分肝癌患者有肝炎而導致肝硬化，令佢哋嘅肝功能受損；而當肝癌出現嘅時候，腫瘤亦會壓迫、代替正常嘅組織，進一步令肝功能下降；隨住病情演進，患者嘅肝功能會愈嚟愈差。

 

肝功能嘅好壞，往往會影響治療選擇同成效。換句話講，如果肝功能好，治療成效會較好，治療選擇亦會較多，反之亦然。

 

對早期、中期患者嚟講，外科手術、消融治療、經動脈化療栓塞都要求良好肝功能；至於要接受全身性治療嘅患者，研究發現，如果患者肝功能良好，治療成效會較好。相反，患者肝功能如果較差，就可能無法使用部分治療控制病情，甚至只能接受紓緩治療。

 

以晚期肝癌嘅一線治療, 即係標靶治療為例。

 

一個大型研究發現，肝功能較理想嘅患者，佢哋使用標靶藥後嘅無惡化存活期同總存活期都較長。相比第一代標靶治療，新一代標靶治療延長無惡化存活期同總存活期，用於肝功能較好嘅患者療效更為顯著。

 

#肝明之旅 #肝癌 #肝功能 #肝癌治療 #肝硬化 #與我何肝

 

吳劍邦醫生提醒：以上內容僅供參考，所有預防及治療方法都有不同的成效、副作用及風險。如有疑問，請向主診醫生查詢。